River Easements Patamnan og Kahoy

Isibog na sa Del Monte Philippines Incorporated(DMPI) ang ilang mga tanom nga pinya kilid sa mga river ug creek agi’g pagtuman sa kasabutan tali sa lungsod sa Manolo Fortich, DMPI ug DMPI Employees Agrarian Reform Beneficiaries Cooperative(DEARBC) sa pagtamod sa 20 metros nga allowance o easement sa 28 ka suba ug sapa sa tibuok lungsod nga miagi sa 18 ka pineapple fields sa maong kompanya. Ang maong Memorandum of Agreement gipirmahan Disyembre 2011, dungan sa Monday Convocation sa mga empleyado.

Mianha aron sa pagpirma uban ni Mayor Rogelio N. Quiño si DEARBC President Mr. Dennis Mijares samtang mipirma daan sa kontrata alang sa DMPI sila si Mr. Edgardo M. Cruz, Jr. DMPI Director ug Jesusa Natividad Rojas- Chief Financial Officer. Ni-witness sa pirmahanay sila si Andre S. Jaranilla- Group Head Plantation Operations sa DMPI ug 1st District Board Member Clive D. Quiño samtang misaksi sa palibot ang mga konsehales sa lungsod ug legal people sa matag kampo.

Sigon sa schedule of reforestation, nagsugod na ang pagpananom sa mga kahoy ning tuiga ug ipadayon sa tuig 2012 samtang hinayhinay nga ma-harvest ang mga natanom nga pinya nga milapas sa easement. Ang MOA naghatag usab og tahas sa DMPI nga maghatag og kaugalingong tree seedlings ug magpahigayon og kaugalingong tree planting activity aron matamnan ang mga easements sulod sa ilang area. Ang LGU maoy magsiguro nga masunod ang gikasabutan ug pinaagi sa pag-abag sa mga hingtungdang barangay moabag sa pagtanom og kahoy, ug magpatuman sa pagpanalipod sa maong mga dapit. Ang pagpamutol o pagpuong og kahoy sa easement tugutan lamang human adunay igong abiso sa munisipyo ug kon alang sa seguridad ug maayong pagtubo sa mga pinya.

Halos sinto baynte ektaryas(120has) ang mawala nga kapinyahan sa DMPI tungod niining MOA busa mapasalamaton si Mayor Quiño nga nasabtan sa kompanya ang maayong tumong sa kasabutan ug sila nahimong abli sa pagtabang og pag-abag sa atong komunidad ug pagsalbar sa kinaiyahan.