Bag-ong Buildings Tukoron sa Bagalangit Elementary School

Nagtinabangay ang Pangagamhanang Lokal sa Manolo Fortich ug ang Join Together Society (JTS), usa ka Koreano nga kahugpungan, alang sa pagtukod og 2-classroom building ug Teacher’s Cottage sa Bagalangit Elementary School nga sakop sa Kalugmanan ning lungsod. Mayo 18, nagtagbo ang mga opisyales sa lungsod pinanguluhan ni Vice Mayor Miguel D. Demata ug ang JTS pinanguluhan  ni Mr. Wonju Lee sa maong dapit  aron ipahigayon ang ground breaking ceremony. Misaksi usab niini, ang mga school heads sa silingang mga eskwelahan, konseho sa barangay Kalugmanan pinanguluhan ni Kapitan Menelio P. Goayan, mga ginikanan ug mga kabataan nga nagtungha sa Bagalangit.

Matud pa ni Mr. Lee, nakita niya ang sitwasyon sa mga maestra nga matulog lamang sa usa ka gi-ayom ayom nga lawak sa eskwelahan busa naaghat sila nga motabang. Dili lamang kini ang unang pagpatukod og classroom sa JTS sa maong eskwelahan. Gani ang tukorong classroom abay lamang sa napatukod nga  school building sa mga estudyanteng  volunteers gikan sa Korea nga mibisita kanhi sa dapit. Ang kinatibuk-ang proyekto mikantidad og dos milyones ka pesos (P2M) ug i-implementar pinaagi sa 60-40 sharing diin 60% ang iya sa JTS, ug 40% ang paga-gastuhan sa lungsod.

Leave a Reply

%d bloggers like this: