Bag-ong Pinuy-anan Gihatag!!!

Singkwenta(50) ka pinuy-anan sa Paglaum Village Housing Project sa Dalirig ang gitunol atol sa turn-over ceremony sa maong proyekto Abril 11, 2012. Sila si Governor Alex Calingasan, Mayor Rogelio N. Quiño ug mga konsehales sa lungsod personal nga mitambong aron mahimamat ang mga benepisyaryo sa maong proyekto.

Adunay tag-duha ka kwarto ang gihatag nga 24.59 sq.m. balay ug aduna nay comfort rooms nga naka-attach sa likod sa matag balay. Sanglit 125-150 sq.m. ang area sa luna, aduna pay dapit alang sa backyard gardening ang mga lumulupyo didto. Ug aron nindot tan-awon ang ilang palibot adunay landscaping design nga gisunod ang matag luna ug kabahin niini ang pagtanom og rambutan sa likod sa ilang balay.

Dili tiaw ang kalipay nga gibati sa mga benepisyaryo sa proyekto. Si Mrs. Merlinda Balateria nga taga-Lunocan dako ang pagpasalamat nga nakakuha og unit sa Paglaum tungod kay sa ilang gamayng kita maglisod gayod sila og pagpatukod og susama ka desenteng pinuy-anan ilabi na karon nga daghan na ang iyang anak. Si Mr. Ernesto Alfeche ug ang iyang asawa nga parehas na nga senior citizens, malipayon usab nga naka-plastar sa Paglaum ug nakabiya sa ilang gamayng balay sa kilid sa dalan sa Mangima. Ang maong mga benepisyaryo pipila lamang sa mi-qualify sa makuting screening nga gihimo sa Municipal Housing Board.

Ang maong proyekto nahimong possible pinaagi sa pagtampuhay sa probinsya ug sa lungsod sa mga galastuhan ug pag-abag usab sa mga stakeholders sama sa First Gen Bukidnon, DEARBCI(Del Monte Employees Agrarian Reform Beneficiaries Incorporated), Engr. Elpidio Paras ug Tyson Agriventures Inc. nga nagtagsa pag-abaga sa labor counterpart sa unang upat ka balay sa Paglaum Village.

Leave a Reply

%d bloggers like this: