P3M Worth nga Vitameal Gihatag sa Manolo Fortich

Tungod sa maayong implementasyon sa feeding program sa lungsod sa Manolo Fortich nga miabot pa ngadto sa mga purok ug eskwelahan, dugang 250 ka kartong vitameal nga mobalor og kapin tres milyones ka pesos(P3M) ang gihatag sa Bukidnon Tribal Filipinos Foundation sa lungsod aron hingusgan ang halapad nga feeding sa mga malnourish ug undernourished nga mga bata. Enero 17 , personal nga gidawat ni Konsehal Miguel Demata ug Municipal Nutrition Officer Ma. Eluna Chavez ang maong mga hatag didto sa port area sa Cagayan de Oro City.

Ang maong mga vitameal, iapud apud sa mga Barangay Nutrition Scholars aron mapadayon diha sa mga purok ug eskwelahan sa tibuok lungsod ang nasugdang feeding activities. Igo alang sa tulo ka bulang feeding ang gidaghanon sa ibahin sa barangay ug kini mag-agad usab sa gidaghanon sa mga malnourished. Tungod sa kadaghan sa bitamina ug minerals nga anaa sa vitameal makahatag kini og dakong kausaban sa kahimtang pangnutrisyon labi na sa mga malnourish. Ang vitameal mamahimong isagol sa mga utanon, champorado, binignit ug uban pang putahe.

Sa milabayng tuig, gikan sa ikalimang dapit nga adunay pinaka-ubos nga malnoourish rate sa probinsiya, anaa na kita karon sa ikaupat, busa ang padayong pagtabang sa BTFF sa lungsod, gilantawng makatabang aron mapakubsan pa gayod ang gidaghanon sa atong mga malnourished nga kabataan.