Secretary Andanar, sa Manolo Fortich nag-Independence Day

Sa usa talagsaong higayon, napili ni Presidential Communications Operations Office (PCOO) Secretary Jose Ruperto M. Martin Andanar nga magsaulog sa ika-119 nga Independence Day dinhi sa Manolo Fortich. Si Secretary Andanar uban ni 52nd Engineering Brigade Commander Col. Dionisio C Baudin Jr., ang nangulo sa pagpakayab sa nasudnong bandila samtang gikanta ang nasudnong awit uban ang Manolo Fortich National High School SPA (Special Program for the Arts) Vocals. Kini atol sa kasaulogan nga gipahigayon sa Legislative Compound ug gitambungan sa mga opisyales ug empleyado sa lungsod, mga pangulo sa lain-laing ahensya lokal ug nasyonal ug ingon man mga uniformed personnel.

Matud pa ni Andanar, ang mga cabinet secretaries sa pangulo gipakatag sa lain laing dapit atol sa pagsaulog sa Independence day agi og pagpadayag nga taliwala sa kagubot sa Marawi, padayon gihapon ang kalihukan, panginabuhi ug komersyo sa ubang dapit sa Mindanao.  Ug kini matud pa ang rason nga iyang gipili nga dinhi saulogon ang Independence day. Ang Manolo Fortich, matud pa ni Secretary Andanar nga nagdako sa Cagayan de Oro City, padayon nga naglambo. Ang turismo anaa buhi ug ang mga katawhan nagkahiusa ug padayon nga nakigbisog sa kinabuhi.

Sa iyang pagpakigpulong gipangayo niya ang hamubong kahilom ug  giaghat ang tanan nga iampo ug suportahan ang mga sundalo nga nakig-gyera sa Marawi. “While they are at war, we should praise them and make them feel that they are the real heroes of our country today,” matud pa niya.  Agi og pagsaludar sa mga sundalo ug pulis nga namatay sa Marawi, sa udtong tutok, usa ka video ang gipasundayag sa tibuok Pilipinas diin anaa ang pangalanug hulagway sa mga bayani sa Marawi.

Dugang pa ni Secretary Andanar, ang pagpataas sa mga Maute sa bandila sa ISIS nagpasabot sa ilang pagluib sa ilang pagpanumpa sa “katapatan” sa Republika ng Pilipinas. “Isa lamang ang ibig sabihin nito: nais nilang humiwalay sa Pilipinas. Hindi ito maaaring mangyari at hindi ito papayagan ng ating pamahalaan at maging ng ating kapwa Pilipino,” dugang pa niya. Tema sa kasaulogan karong tuiga ang “Kalayaan 2017: Pagbabagong Sama-samang Babalikatin”.

Si Secretary Andanar ug Col. Baudin, nangulo usab sa naandang wreath laying ceremony sa monumento ni Dr. Jose Rizal ug pagpalupad sa mga salampati pagsimbolo sa kalinaw. Sila si Mayor Clive D. Quiño, Vice Mayor Miguel D. Demata ug mga konsehales sa lungsod nagpalupad usab og mga puting balloons pagsimbolo sa pangindahay nga maangkon na ang matuod nga kalinaw. Gipasidunggan usab sa kalihukan ang mga upat ka nahibiling beterano sa Manolo Fortich nga sila si Cresino D. Bahaynon, Adelino L. Gaspe, Sancho M. Mamac ug Celestino M. Onahon uban ang mga asawa sa laing 26 ka mga namatay nga beterano. Nakigduyog usab sa kasaulogan dinhi sa Manolo Fortich sila si kanhi Presidential Adviser for Environmental Protection ug kanhi Kongresista  Neric O. Acosta ug Department of Tourism Region 10 Director Marie Elaine Unchuan.

Leave a Reply

%d bloggers like this: